COS MELLORES DESEXOS...TAMÉN PARA O GALEGO

O Equipo de Normalización e Dinamización Lingüística pon en marcha unha campaña para visibilizar o apoio a nivel individual ao proceso de normalización da lingua galega da comunidade educativa do IES de Viós.

Así, animados pola tenrura e a solidariedade cos máis desfavorecidos propias do Nadal, queremos provocar unha reflexión esperanzadora sobre a necesidade e fomento da nosa lingua en distintos sectores.
Imos montar unha árbore de nadal seca de savia, mais cos nosos mellores desexos para o galego en forma de minipostais, posicionarémonos a prol do fomento da lingua. Coas nosas mensaxes positivas, encheremos o 2013 de novo zume normalizador.

 Anímate! Pensa nun desexo, redacta a túa tarxeta, decóraa ao teu gusto... Nós colgarémola da árbore e,      se ao xurado lle parece a máis orixinal, creativa e normalizadora... PREMIO!! 

OLLOS DE AULA Nº 3

Ollos de aula. Nº 3

REMATAMOS O CONTRASINAL

Xa temos ganadores desta 2ª edición! Clara e Pablo fixéronnos gozar nunha final espectacular. Demostraron ser uns auténticos especialistas neste xogo. Abofé que controlan de relacións semánticas : para eles a sinonimia, a antonimia ou a hiperonimia non parecen ter ningún misterio! E iso que Sabela e Álvaro, os ganadores do concurso o ano pasado, non llelo puxeron fácil. Foi unha final ben disputada e ben emocionante para todos.

Parabéns ás dúas parellas e... ata o ano que vén!

CONTRASINAL

Estamos rematando esta 2ª edición!! Non faltes o mércores 5 á final! Competirán as parellas formadas por Pablo e Clara, representando a 2º de ESO e Álvaro e Sabela, que representan a 4º.
Promete ser moi disputada!

2ª EDICIÓN DO CONTRASINAL

Esta semana empezamos coa segunda edición do Contrasinal, o  concurso organizado polo ENDL e co que pretendemos corrixir interferencias e castelanismos demasiado presentes na nosa fala coloquial.

Xa están seleccionadas as parellas de concursantes que representarán a cada clase e iniciada a primeira fase do concurso.

Teredes que estar atentos ás datas que imos poñendo no cartaz do corredor, pois varían en función da coincidencia con outras actividades nos recreos. En principio, propoñémonos facelo os luns e mércores, coma o curso pasado, no salón de usos múltiples. Aí vos agardamos!!

Ollos de aula

Xa está á vosa disposición  o segundo número da revista Ollos de aula. O primeiro número chegouvos a todas as familias impreso, pero, a partir de agora, aproveitaremos esta canle: máis sostible, máis económica, máis racional...

Xa navegas en galego?

Se aínda non tes configurado o teu Explorer para navegar pola rede como galego podes facelo seguindo os pasos que che indican neste blog. Entra en Navega en galego

Ollos de aula

Empezamos un novo curso cunha nova que nos anima: a publicación do 1º número de Ollos de aula, unha revista educativa coa que a Coordinadora Galega de Equipos de Normalización e Dinamización Lingüística quere dar respostas as dúbidas das familias do alumnado.

A CGENDL di na súa presentación que na revista "... procurarase darlle resposta ás preguntas que formulen as familias, afondar en temas de actualidade, explicar conceptos propios do ensino ou achegar suxestións (lectura, música, viaxes...) para seren compartidas cos fillos e fillas..."

Oportunidades que,  ben seguro, saberemos aproveitar.

Cos parabéns do noso ENDL! Deixamos aquí o enlace para que teñades fácil acceso e veremos de poder facérvola chegar a todos a través doutras canles. 

PARABÉNS!

Collemos vacacións! Esta é a última entrada no blog deste curso e queremos despedirnos felicitando especialmente a dous centros de ensino que, malia todos os atrancos, cambadelas e recortes, seguiron traballando, sen desánimo, en proxectos que nos animan a todos a intentar cambiar o que non nos gusta e, ao tempo, a manter todo aquilo que nos identifica, que nos fai ser quen somos.

O CEIP Mosteiro de Caaveiro da Capela acaba de recibir o 1º premio que o Diario de Ferrol concede a un centro de ensino. Con el recoñécese o traballo que os profesionais deste centro teñen feito, ao longo destes anos, a prol da divulgación dos xogos de sempre. Moitos de nós gozamos no seu Centro de Interpretación Brinquedos, co que pretenden normalizar o xogo como fonte de pracer e aprendizaxe.

Un recoñecemento ben merecido e do que nos aledamos. Parabéns!!

E felicitacións tamén ao IES Maximino Romero de Lema de Baio polo vídeo que van presentar o día 28 de xuño no Parlamento Europeo en Bruxelas, convidados polo grupo Alianza dos Verdes. O EDL dese centro elaborou, cun grupo de alumnos de 1º de BAC, un vídeo de divulgación sobre o patrimonio natural da Costa da Morte, no que aproveitan tamén para denunciar proxectos e infraestruturas construídas que atentan contra a calidade medioambiental desa zona que, malia estar integrada na Rede Natura, non sempre é respectada. A presenza de grandes piscifactorías ameaza seriamente a calidade das augas e a riqueza da fauna e da flora do litoral.

Deixamos este enlace para que poidades ver os materiais audiovisuais que teñen colgados na súa revista dixital A Cidá.

Os nosos parabéns por un traballo tan ben feito e tan necesario.

Abur!! Volveremos en setembro!!

Encontro con David Pintor

A Semana da Letras trouxo tamén ao noso centro diversos actos festivos. Un deles foi a visita do ilustrador David Pintor, o cincuenta por cento de Pinto e Chinto. David explicounos que el representa a metade máis especializada na ilustración da parella creativa , e da man da ilustración levounos á caricatura.

 Logo de contarnos que foi Siro, o coñecido ilustrador ferrolán, quen impulsou esta parella de debuxantes, David Pintor deunos as claves para introducirnos na elaboración de caricaturas. E, claro, as dos políticos sempre se prestan para rir a cachón!

Encontros con Núñez Singala

No EDL estamos convencidos  de que estas van ser unhas semanas moi proveitosas para todos os que desexamos que a presenza do galego vaia en aumento no noso centro. Comezamos o luns coa visita do equipo artístico da película Vilamor. Fixéronnos reflexionar sobre a importancia de mostrar a cultura galega no mundo do cinema...
Continuamos o mércores coa visita de Manuel Núñez Singala, que falou co alumnado de 3 º e 4º de simplificacións e prexuízos sobre a lingua galega. A través dunha atractiva presentación, e dun xeito ben ameno, axudounos a desmontar algúns dos prexuízos máis comúns e que perviven aínda na mente de moitos galegos.
Deixamos aquí unha mini galería de fotos. Para lembrar...

E aínda nos queda, xa volo anunciamos, a visita de Pinto e Chinto  o día 16!

Unha de cine: Vilamor

O luns 7 maio chegou ao centro unha onda de ilusión por un mundo mellor. Nós decidimos deixarnos ir e tentar facelo realidade. Da man dos actores e do director de Vilamor, a última película de Ignacio Vilar, soubemos dos procesos de facer unha longametraxe, asistimos a unha representación dunha secuencia, achegámonos á sinopse de boca dos seus actores...

Vilamor por Viós on PhotoPeach

 Agora tendes que animarvos a participar cun vídeo voso na iniciativa "tes que vela"; aquí vos quedan as bases do concurso. E, claro, quedamos para vela?


Trailer Vilamor from Vilamor on Vimeo.

Xincana en Mondoñedo co IES Elviña

Da man de Álvaro Cunqueiro, naceu unha xornada lúdica, literaria, histórica... amigable por Mondoñedo e pola Mariña oriental. Dous grupos de 4º ESO, un do IES Elviña e outro do IES de Viós, achegámonos o pasado 19 de abril á vila natal de varios mindonienses ilustres: Cunqueiro, Leiras Pulpeiro, Noriega Varela e Pascual Veiga. Alí, realizamos unha xincana que nos levou á ponte do Pasatempo, á pouco convencional tumba de Leiras Pulpeiro... Ten o seu aquel ler alí mesmo o famoso epitafio de Cunqueiro!

 Logo, sumámoslle á xornada un xantar en Ribadeo, un paseo por esta vila con vistas á veciña Asturias, unha sesión fotográfica nas praia das Catedrais, unha visita ao primeiro Mondoñedo, o de Foz! A este día completiño deulle verdadeiro sentido e unidade o obxectivo principal da actividade: coñecer xente nova, é dicir, as verdadeiras redes sociais! Agora quedamos e falamos nas outras, para argallarmos xuntos mil primaveras máis e para que se namore quen poida! 

Mil primaveras máis... on PhotoPeach

Novo dicionario en liña da RAG

Deixamos aquí o enlace a unha ferramenta moi esperada e que supoñemos será de moita utilidade para todos vós: o dicionario electrónico da RAG xa se pode consultar en rede. Ides ver como o seu manexo é moi doado e moi completa a información que aporta: arredor de 50.000 entradas co seu significado , información gramatical, sinónimos, antónimos, exemplos de uso, familia léxica... todo o que precisamos para o uso correcto da nosa lingua.

Un novo recurso que agradecemos os que andamos enleados coas palabras.

DÍA DA MULLER TRABALLADORA

Hoxe, 8 de marzo, conmemoramos no IES o Día Internacional da Muller , e tivemos a sorte de poder facelo dende o particular punto de vista do humor do Carrabouxo. As súas viñetas leváronnos a reflexionar, dende a ironía ou a caricatura, sobre a situación da muller na sociedade actual. Desde esta páxina, queremos agradecer ao IES O Mosteirón o préstamo desta exposición da que puidemos tirar proveito.

Mini atlas xeobotánico de Galicia

Estupenda web que queremos compartir convosco. Vímola en Carta Xeométrica e pareceunos que sería inescusable non poñela aquí a disposición de todos os que estades, por unha razón ou por outra, interesados en saber máis sobre os espazos xeobotánicos de Galicia. Creada por Mª Jesús Mourazos González, esta web resulta un atractivo recurso educativo que nos permíte identificar as árbores máis comúns, os matos, as plantas, os fentos... e a distinguir as características dos seus hábitats, entre outras moitas cousas, pero sobre todo, aprenderemos a nomear o que nos rodea.

Copiamos a frase da portada da web: "Se ignoras o nome das cousas, desaparece tamén o que sabes delas" Carl von Linné 1755

Amoriños collín...

No IES de Viós celebramos a nosa particular gala do amor o martes 14 de febreiro. Foi a cerimonia de entrega de premios do noso Corcurso de microrrelatos Amoriños collín... en 100 palabras.

Botámolo a andar o Departamento de Lingua Galega e Literatura e mais o Equipo Normalización e Dinamización Lingüística. Comezamos mergullánnos na técnica do microrrelatos, cunha escolma deles tirada de Nin che conto, de Xosé Manuel Eyré. Axudouno tamén un decálogo adaptado da Cadena SER. Así, foi todo o alumnado elaborando os seus propios microrrelatos: literatura da terra, literatura en galego!

Deixámosvos aquí unhas imaxes da nosa gala de microrrelatos, na que poderedes ler o texto gañador e tamén os tres accésits que decidiu outorgar o xurado. Parabéns ao gañador e felicidades tamén os tres autores das mencións especiais.

E como se dixo na gala, non sexades malos; deixádevos querer, agora e sempre, pola literatura, polos libros e pola lingua galega!

XULIA: Que magnífico exemplo!

AMORIÑOS COLLÍN...

Xa está posto en marcha o concurso de microrrelatos Amoriños collín... que organizamos entre o EDL e o Departamento de Lingua Galega. A estas alturas, todos debedes saber que é e que non é un microrrelato e coñecedes as bases do concurso, expostas nos corredores,só queda animarvos a participar. Lembrade que o prazo para depositalos na urna - na biblioteca-remata o mércores 8. Os microrrelatos presentados estarán expostos no espazo da lingua do vestíbulo. Animádevos!! Ten premio!!

A paz, cuestión de fondo

Desde hoxe, e ata fin de mes, contamos no centro coa exposición A paz, cuestión de fondo. Serviranos de base para conmemorar o día 30 de xaneiro o Día Internacional da Paz. A exposición , organizada polo Fondo Galego de Cooperación e Solidariedade, chega a nós grazas ao Concello de Abegondo. A mostra está formada por 16 cartaces, cada un deles con dúas ilustracións realizadas por 16 artistas de diferentes países que nos fan reflexionar a través das súas ilustracións sobre os prexuízos existentes arredor do racismo, da guerra, das desigualdades sociais... Segundo os seus organizadores, a exposición propón verdades en miniatura que retratan a sociedade contemporáanea, que serve de repaso á realidade actual e tamén como punto de debate cargado de sátira e ironía para amosar a cruenta realidade.