A paz, cuestión de fondo

Desde hoxe, e ata fin de mes, contamos no centro coa exposición A paz, cuestión de fondo. Serviranos de base para conmemorar o día 30 de xaneiro o Día Internacional da Paz. A exposición , organizada polo Fondo Galego de Cooperación e Solidariedade, chega a nós grazas ao Concello de Abegondo. A mostra está formada por 16 cartaces, cada un deles con dúas ilustracións realizadas por 16 artistas de diferentes países que nos fan reflexionar a través das súas ilustracións sobre os prexuízos existentes arredor do racismo, da guerra, das desigualdades sociais... Segundo os seus organizadores, a exposición propón verdades en miniatura que retratan a sociedade contemporáanea, que serve de repaso á realidade actual e tamén como punto de debate cargado de sátira e ironía para amosar a cruenta realidade.

BO NADAL

O Valedor do Pobo e a lingua propia de Galicia

Recollemos aquí o posicionamento da Coordinadora Galega de Equipos de Dinamización Lingüística ante a resolución tomada polo Valedor do Pobo na que solicita a retirada dun libro de texto de Educación Primaria. E recollémola tal cual porque, como EDL do IES de Viós subscribimos cada unha das súas palabras: non podiamos dicilo nin máis claro, nin máis forte, nin mellor.

REGALA GALEGO

Máis ideas para regalar galego e en galego: coma en anos anteriores collemos emprestado o catálogo de agasallos que elaboran no CPI Vicente Otero Valcárcel de Carral Toma nota!

AGASALLA GALEGO

Catálogo de nadal de Abertos ao Galego

Publish at Calaméo or browse others.

Agasalla en galego! Aquí tes algunhas ideas que A MESA reúne nun catálogo para axudarche na túa procura: Son produtos en galego e produtos de empresas que traballan en galego. Outra forma máis de dinamizar a lingua dentro do ámbito empresarial.

FINAL DO CONTRASINAL

Rematamos o noso concurso do CONTRASINAL. Unha mágoa, a verdade! Xa nos afixeramos a que, con cada recreo, chegase a hora de escoitar aos nosos compañeiros e compañeiras, de velos actuar competindo por ser a parella que máis palabras acertaba, a que menos castelanismos empregaba, a que era capaz de cazalos nun voo e corrixilos segundo "escapaban" das súas bocas...en fin, competindo por acadar unha vitoria que, a medida que nos aproximabamos á final, era máis difícil de conseguir.

No Equipo de Dinamización Lingüística quedamos máis que satisfeitos: moi satisfeitos. Non esperabamos que o concurso tivese tan boa acollida. Era realmente un pracer ver a sala chea cada recreo. A final foi ben emocionante e ben reñida. Gañou a parella formada por Álvaro e Sabela, do grupo de 3º bilingüe, pero a diferenza coa parella que representaba a 1º A , Lorena e Clara, foi certamente escasa.

Sen dúbida, un concurso que lembraremos, tanto polo ben que nolo fixeron pasar, como polo que con eles aprendemos!

CONTRASINAL

Rematada a 1ª fase do concurso do Contrasinal, pasan a semifinais as seguintes parellas:

• 
  
  Adrián e Carlos de 4º


• 
  
  Álvaro e Sabela de 3º


• 
  
  Iago e Alexandre de 2º


• 
  
  Clara e Lorena de 1º

Estade atentos ao cartaz do corredor onde vos iremos avisando das datas de cada unha das quendas. O mércores 30 continuamos! Non faltedes: a competición vai gañando emoción conforme nos imos achegando á final.

CONTRASINAL

LEMBRADE! O próximo luns 21, no recreo e na aula de usos múltiples, terá lugar a primeira fase do concurso CONTRASINAL que organiza o EDL xunto co Departamento de Galego. Unha vez seleccionadas as parellas que representarán a cada clase, a primeira quenda correspóndelles aos dous grupos de 4º. Tedes no corredor o cartaz coas bases, coas regras e co marcador para que poidades seguir a competición.

Non faltedes! Promete ser entretido!!

RECURSOS PARA A APRENDIZAXE

Unha novidade nesta sección: coa chegada de Fátima Ruibal ao Departamento de Galego chegou tamén o seu blog: GALEGOparaTIc .

Un blog ben completo en recursos de todo tipo, con moitas posibilidades de exercicios e actividades interactivas que Fátima vai actualizando en función dos contidos que se están a traballar nas aulas.

Así que, aí vos "desviamos". Picade no enlace e tedes acceso directo.

CUNQUEIRO, tamén no cinema

Este venres estréase Sinbad nos cinemas galegos. É unha adaptación da obra de Cunqueiro dirixida por Antón Dobao e protagonizada por Xosé Olveira "Pico",no papel de Sinbad e Sara Casanovas, Luís Zahera ou Antonio Durán "Morris", entre outros actores e actrices.

Sinbad, extraordinario fabulador, conta as súas viaxes pasadas, reais ou non, aos seus compañeiros diarios de café e dominó na taberna. O dono desta, Mansur, é viúvo e tén unha filla preadolescente, Sara. Sinbad mantén con ela unha relación moi afectuosa. Acompáñaa ás veces á escola e apréndelle cousas do mar e das estrelas. Sara é a mellor receptora de todos os contos que narra Sinbad. Historia baseada na novela de Álvaro Cunqueiro Si o vello Sinbad volvese ás illas. Iniciouse a rodaxe o 9/5/2011e estréase nas salas comerciais o 28/10/2011 (6 salas en VO galego). A súa estrea na CRTVG está prevista para decembro de 2011.

Xa sabedes, aproveitade! Non hai moitas ocasións de ver cine en galego!